Мэндчилгээ

Хэвлэх

Монгол Улсад байнгын ажиллагаатай, бие даасан, хараат бус сонгуулийн байгууллага байгуулагдаад 20 гаруй жил болж байна. Энэ өдрүүдэд туулж ирсэн ардчилсан сонгуулийн түүхэн замналаа эргэн харж бодитой үнэлэхийн сацуу түүнийг боловсронгуй болгох, сонгуулийн ардчиллыг дэлхий нийтийн жишгийн дагуу хөгжүүлэх нь Монгол Улсын Сонгуулийн Ерөнхий Хорооны эрхэм зорилт билээ.


Энэхүү 20 жилийн түүхэн замнал нь Монгол Улсын төрийн сонгуулийн түүхэнд онцгой байр суурь эзлэх болно. Манай иргэд сонгогчид энэ хугацаанд төрийн эрх барих дээд байгууллагаа 6 удаа, Монгол төрийн тэргүүнээ 5 удаа сонгож орон нутгийн бүх шатны сонгуульд идэвхтэй оролцлоо. Эдгээр сонгуулийг хуулийн хүрээнд шударга явуулах, нээлттэй, ил тод болгох, иргэдэд төрийг удирдах хэрэгт оролцох эрхээ бүрэн эдлэх бүхий л нөхцлийг бүрдүүлэхийг Монгол Улсын Сонгуулийн Ерөнхий Хороо эрхэмлэн ажиллалаа.


Сонгуулийг ардчилсан зарчим, хэм хэмжээнд нийцүүлэн зохион байгуулах улмаар сонгуулийн шинэчлэлийг хэрэгжүүлэх түүний эрх зүйн орчинг боловсронгуй болгох явдал нэн чухал зорилт байсныг онцлон тэмдэглэх нь зүйтэй.


Монгол Улсын сонгуулийн эрх зүйн суурь үндэс, зарчмыг тодорхойлж өгөхийн хамт  гадаад улсад байгаа Монгол иргэдийнхээ саналыг авах, сонгогчийн санал авах, тоолох ажиллагаанд орчин үеийн автоматжуулсан системийн техник, технологи ашиглах зэрэг сонгуулийн түүхэнд бичигдэх шинэчлэлийн олон ажлыг амжилттай хэрэгжүүлж байна. Энэхүү сонгуулийн шинэчлэл, арга туршлага нь олон улсад зохих ёсоор үнэлэгдэж байна.


Өнгөрсөн хугацаанд Монгол Улсын Сонгуулийн байгууллагын үйл ажиллагаа төлөвшиж, түүний эрх, үүрэг ялангуяа хараат бус, бие даасан байдал нь эрх зүйн хувьд баталгаажлаа.


Сонгуулийг шударга, нээлттэй болгоход төрийн төдийгүй олон нийтийн болон хэвлэл, мэдээллийн байгууллагын оролцоо, хувь нэмэр, эрх үүрэг ихээхэн өргөжлөө. Манай байгууллагын гадаад харилцаа, хамтын ажиллагаа өргөжиж, сонгуулийг улам нээлттэй, ил тод болгох, сонгогчдын боловсролыг нэмэгдүүлэх, тэднийг соён гэгээрүүлэхэд чиглэсэн олон улсын байгууллагын төсөл, хөтөлбөрүүд амжилттай хэрэгжиж ирлээ.


Монгол Улсад сонгуулийн түүхийг хамт бичилцэж буй бүх шатны сонгуулийн хороодод ажиллаж байсан, сонгууль зохион байгуулахад дэмжлэг туслалцаа үзүүлж хамтран ажилладаг бүх хүмүүс, байгууллага, хамт олон, нийт сонгогч түмэндээ чин сэтгэлийн талархал илэрхийлье.


               МОНГОЛ УЛСЫН

СОНГУУЛИЙН ЕРӨНХИЙ ХОРООНЫ                                                              Ч.СОДНОМЦЭРЭН

                    ДАРГА                                                                             






Бидэнтэй нэгдэх
  • Facebook
  • Twitter
  • Google Plus
  • YouTube
  • SlideShare

  • Copyright © 1992-2012 Сонгуулийн Ерөнхий Хороо. All rights reserved.
    Бүх материал болон вэб сайтын дизайны зохиогчийн эрхийг Сонгуулийн Ерөнхий Хороо эзэмших эрхтэй.