ОХУ-ын Ерөнхийлөгчийн сонгууль боллоо

Хэвлэх2018.03.19

Оросын Холбооны Улсын Ерөнхийлөгчийн ээлжит сонгууль 2018 оны 3 дугаар сарын 18-ны Ням гарагт болж өнгөрлөө.

Энэ удаагийн Ерөнхийлөгчийн сонгуульд С.Н.Бабурин  /”Оросын бүх ардын холбоо” нам/,  П.Н.Грудинин /Оросын Коммунист нам/, В.В.Жириновский /Оросын Либерал-ардчилсан нам/, В.В.Путин /бие даан нэр дэвшигч/,  К.А.Собчак /”ГРАНИ” нам/, М.А.Сурайкин /“Оросын коммунистууд” коммунист нам/, Б.Ю.Титов /”РОСТА” нам/,  Г.А. Явлинский /”Яблоко” нам/ нар тус тус нэрээ дэвшүүлсэн билээ.

Оросын Сонгуулийн төв комиссоос мэдээлснээр, 54,4 сая сонгогч саналаа өгсөн бөгөөд санал тооллого 99 хувьтай байгаа юм.

Тооллогын дүнгээр одоогийн Ерөнхийлөгч Владимир Путин нийт саналаа өгсөн сонгогчдын 76,66 хувийн саналыг авч тэргүүлсэн байна. Харин нэр дэвшигч Павел Грудинин – 11,80% санал авсан бол Владимир Жириновский – 5,67%,  Ксения Собчак – 1,67%, Григорий Явлинский — 1,04%, Борис Титов — 0,76%, Максим Сурайкин— 0,68%, Сергей Бабурин — 0,65% санал аваад байгаа ажээ.

·         Бие даан нэр дэвшигч Владимир Путин ОХУ-ын Ерөнхийлөгчийн  2012 оны сонгуульд авч байснаасаа илүү олон санал авсан байна. Түүнийг дэмжиж 45,7сая гаруй сонгогч саналаа өгчээ.

·         Сонгогчдын 67 хувь нь сонгуулийн 46 мянган хэсэгт очиж саналаа өгсөн байна.

·         Гадаадын 145 улсад 385 санал авах байр ажиллуулжээ.

·         Оросын Ерөнхийлөгчийн энэ удаагийн сонгуульд 107 сая 230 мянган сонгогч сонгогчдын нэрийн жагсаалтад бүртгэгдсэн байна.  Мөн 1,5 сая гаруй иргэн гадаад улсуудад байгуулагдсан хэсгүүдэд саналаа өгөхөөр бүртгэгдсэн байв.

·         Оросын 7 сая гаруй иргэн Ерөнхийлөгчийн сонгуульд оролцож, анх удаа саналаа өгчээ.

·         “Госзнак”  хэвлэх үйлдвэрт гадаадад оршин суугаа иргэдэд зориулж нийт 1 сая 893 мянган 115 саналын хуудас хэвлэж хүргүүлжээ.

·         Сонгуулийн орон нутгийн комиссын 30 хувьд нь дарга нар нь, 50 хувьд нь тэдгээрийн орлогч нар нь өөрчлөгджээ.

·         Оросын Сонгуулийн Төв Комисст сонгуультай холбоотой 400 орчим гомдол ирсэн бөгөөд тэдгээрийг шуурхай хэлэлцэн шийдвэрлэсэн байна.

·         Сонгууль ажиглахаар гадаадын болон олон улсын байгууллагын нийт 1,4 мянган ажиглагчид бүртгэгджээ. Түүний дотор Европын аюулгүй байдал, хамтын ажиллагааны байгууллага 25 орны 60 ажиглагчдыг удаан хугацаагаар, 420 гаруй ажиглагчдыг богино хугацаагаар бүрэлдэхүүндээ багтаан ажиллуулсан байна.

·         5,6 сая иргэд байнга оршин суугаа газраасаа өөр санал авах байранд саналаа өгөхөөр хүсэлтээ гаргажээ.

·         Сонгуулийн үйл явцад хөндлөнгийн ажиглалт хийх 100 мянган хүсэлт ирүүлжээ.

·         Сонгогчдын 80 гаруй хувь нь видео ажиглалт хийх техник хэрэгсэлтэй санал авах байранд саналаа өгсөн байна.

·         Орон нутаг дахь 2,7 мянган санал авах байранд видео камер байрлуулж, санал авах үйл ажиллагааг шууд ажиглах боломжоор хангав.

·         Оросын сонгуульд анх удаа сонгуулийн санал тооллогын протокол үйлдэх, дүн нэгтгэх ажиллагаандаа QR код бүхий технологи ашиглаж, сонгуулийн баримт бичиг, тооллогын дүнгийн үнэн зөв байдлыг баталгаажуулах ажил хийгдэв.

·          Саналын хуудас тоолох 13.5 мянган автомат иж бүрдэл ашиглажээ.

·         Түр оршин байгаа газар саналаа өгөх ажиллагааг хөнгөвчлөх зорилгоор  “Мобильный избиратель” системийг анх удаа ашиглажээ.

·         Оросын 1,5 сая иргэд санал хураалтын явцыг Интернетээр ажиглах боломжтой байв.

·         Оросын өдөр тутмын 15 сонин, холбооны 5 телевиз, 3 радиод  үнэгүй сурталчилгаа  хийх эрх олгожээ.









Энд дарна уу




Бидэнтэй нэгдэх
  • Facebook
  • Twitter
  • Google Plus
  • YouTube
  • SlideShare

  • Copyright © 1992-2012 Сонгуулийн Ерөнхий Хороо. All rights reserved.
    Бүх материал болон вэб сайтын дизайны зохиогчийн эрхийг Сонгуулийн Ерөнхий Хороо эзэмших эрхтэй.